കിൻഫ്രയുടെ നേതൃത്വത്തിലുള്ള പ്രതിരോധ മേഖലയ്ക്കായി മാത്രമായി സജ്ജമാക്കിയിട്ടുള്ള രാജ്യത്തെ ആദ്യ വ്യവസായ പാർക്ക് പാലക്കാട് ജില്ലയിലെ ഒറ്റപ്പാലത്ത്. പ്രതിരോധ മേഖലയുമായി ബന്ധപ്പെട്ട നിർമ്മാണം, ഗവേഷണം, വിശകലനം, സർട്ടിഫിക്കേഷൻ എന്നിവയായിരിക്കും പ്രധാന മേഖലകൾ. ചെറിയ ആയുധങ്ങളും തോക്കുകളും നിർമ്മിക്കുന്നതിനുള്ള യൂണിറ്റുകൾ ആവും ഇവിടെ പ്രവർത്തിക്കുക. ഇതിനോടകംതന്നെ ഒറ്റ എൻജിൻ വിമാനങ്ങളുടെ ഉപകരണങ്ങൾ നിർമ്മിക്കുന്നതിനുള്ള സൗകര്യവും ഉണ്ട്.
അടുത്തമാസം പകുതിയോടെ മുഖ്യമന്ത്രി പാർക്ക് ഉദ്ഘാടനം ചെയ്യും. 60 ഏക്കർ സ്ഥലത്താണ് പദ്ധതി നടപ്പാക്കിയിരിക്കുന്നത്. പ്രതിരോധം പാർക്ക് വരുന്നതിലൂടെ അയ്യായിരത്തിലധികം തൊഴിൽ അവസരങ്ങൾ സൃഷ്ടിക്കാനാവും എന്നാണ് പ്രതീക്ഷ.
പ്രതിരോധ മേഖലയുമായി ബന്ധപ്പെട്ട് പ്രവർത്തിക്കുന്ന വ്യവസായ സംരംഭകരെ കണ്ടെത്തി ഒരു നിശ്ചിത സമയത്തേക്ക് ഭൂമി കൈമാറുകയാണ് ചെയ്യുന്നത്. മുപ്പതോളം സംരംഭകർ ഇതിനോടകം താൽപര്യം പ്രകടിപ്പിച്ചിട്ടുണ്ട്. ഈ മേഖലയിൽ പ്രവർത്തിക്കുന്ന സംരംഭകരെ ഒരു കുടക്കീഴിൽ കൊണ്ടുവരിക എന്നതാണ് ഈ പദ്ധതിയുടെ പ്രധാന ലക്ഷ്യം.